атысты біртіндеп шоғырландыру

(Последовательное сосредоточение огня)

артиллериялық атыстың түрі; шабуылды артиллериялық қолдау әдісі. Қарсыластың шабуылдаушы әскерлерінің маңдайшебі алдындағы және қапталдарындағы тірек пункттерін, атыс құралдарын, басқару пункттерін және т.б. нысаналарды шоғырланған атыспен біртіндеп жоюға арналады. А.б.ш. шабуылда, сондай-ақ қорғаныста шешуші соққы беруде (қарсы шабуылда) қолданылады. А.б.ш. дараланған және қосарланған болуы мүмкін. Дараланған А.б.ш. шабуылдаушы бөлімшелердің тікелей маңдайшебі алдында бір шепте орналасқан нысаналар бойынша жүргізіледі және олардың жылжуы барысында келесі шепке көшіріліп отырады. Қосарланған А.б.ш. екі артиллерия тобымен бір мезгілде жүргізіледі: 1-ші топ — шептегі шабуылдаушы бөлім-шелерге жақын маңдағы нысаналар бойынша, 2-ші топ – екінші шептен бастап, келесі шептегі нысаналар бойынша жүргізеді. А.б.ш-дың бірінші шебі — қарсылас қорғанысының алғы шебіндегі нысаналар бойынша, келесілері – қорғаныс тереңдігіндегі нысаналар бойынша бір-бірінен 300-1000 м қашықтықта тағайындалады. А.б.ш-дың әрбір шебінде дивизиондар немесе батареялар үшін атысты (нысананы) шоғырландыру өңірлері белгіленеді. Бірінші шептегі атыс жүргізу ұзақтығы шабуылдаушы бөлімшелерге шабуылға көшу шебінен өз снарядтарының жарылуының қауіпсіздігі шебіне дейінгі қашықтықтықты өтуге қажет уақытпен, ал келесі шептерде — шептер арақашықтықтарына және шабуылдаушы әскерлердің қозғалысы жылдамдығына байланысты анықталады. А.б.ш-ды жүргізу жалпы әскери құрама командирінің белгісі бойынша шабуыл басында басталады. Атысты кезектегі шепке аудару мотоатқыштар (танк) полкі (батальоны) командирінің белгісімен жүргізіледі. Қосарланған А.б.ш-да артиллерияның 1-ші тобы атысты 1-ші шептен 2-шіге аударады, ал 2-ші топ 2-ші шептен 3-шіге аударады. Мұндай тәртіп А.б.ш-дың бүкіл тереңдігі бойынша сақталады.